無仝款ê廟公_綠翠園鄉土分區forum.xmart.tw/formosa/

	§網綠翠園站§ 　　鄉土分區

無仝款ê廟公

發表：Joy	2022-08-02 13:26:00	閱覽數：743	(IP: 　)	T 7855_R 0	引　用

有一个無講看袂出是老人ê查埔人逐工佇路邊咧種樹栽仔，uì赤牛嶺山跤一直種到鎮南宮頭前，kā環境整理甲誠sù-sī，阮尪講伊tō是廟公。

我心內咧想廟公呔有遮艱苦--ê？我逐擺來爬山，若毋是看伊咧掘土咧種樹栽仔tō是咧掃土跤款環境，極加看伊坐佇土跤咧歇睏，我掠準伊是工友--leh.

Hit-工，伊kā草笠仔褪落來坐佇土跤咧拭汗。阮尪kā相借問：“辛苦ooh～頂面beh做餐廳是毋？沿路環境整理khah好勢咧tō有人客--ah！遮kui-pîng攏你種--ê是毋？”

“無--lah,he咧做便當--lah,無啥生理--lah,我已經幾若工無去頂面看--ah.”

“阿你是廟公是毋？”我猶是誠好玄（hònn-hiân）。

“我佇遮已經做10幾冬ê義工--ah。”伊無講是iah毋是。

“你攏家己一个人咧款咧做hioh?”阮尪泄落來問。

“Hioh!阮某已經khí-khì頂面幾若冬--ah，我攏嘛家己一个人爾爾。”伊那講那giâ頭看天頂。

“按呢誠好--ah,遮ê樹栽仔攏你去買hioh?”

“無--lah,呔有錢通買？攏嘛一面整理樹林仔一面khioh栽仔，khioh著啥tō種啥！”講煞，伊tō企起來，鋤頭giâ--khí-lâi閣開始咧掘土。

我猶是袂當確定伊是廟公iah是干單是義工爾爾。

按呢，這幾工我才慢慢仔tshuē赤牛嶺鎮南宮ê歷史資料，我咧臆（ioh8）伊是客運司機謝天得ê細漢後生，伊ê老爸謝天得為著beh紀念大漢後生開山路意外喪生佇赤牛嶺，將當時政府發放ê撫恤金6000箍捐出來，佇鎮南宮後山起“憶子亭”，了後閣佇鎮南宮兼做義工。謝天得過身了後，細漢後生也接續老爸的遺願佇鎮南宮做義工到今。鎮南宮是民間寺廟，有管理組織，董事長姓李……。毋過，相干ê史料佮新聞，敢若廟公是謝天得in爸仔囝代，我到今嘛是霧煞煞。