馬可吐溫佮我_綠翠園

	§網綠翠園站§ 　　Joy部落格

主題：馬可吐溫佮我

發表：Joy	2021-03-12 23:43:59	閱覽數：1511	(IP: )	T 7488_R 0	引　用

彼年欲uá歇熱ê時，我去舊金山上課，學校安排tuà佇Mary Inn的單身女性套房，一日食早頓佮暗頓兩頓，一个月才收美金720箍爾爾，我佇遐tuà（蹛）誠久，逐工接公司的傳真處理一寡工課，嘛逐暗敲電話予阮尪報平安。毋過，我無想著舊金山的熱天會遐爾仔kuânn（寒），而我的kha-báng只有khǹg（囥）熱天的衫仔褲爾爾。

佇舊金山的第二工，我就坐公車去Market Street的Ross Department Store揣看有裘(hiû)仔通買無？好佳哉！有揣著一領敢若無業遊民咧穿的素面的裘仔，有卡贏無，有就好！

雖然，我逐工咧食自助餐攏食足粗飽ê，也有去China Town買物仔轉來煮，我猶是定定感覺足kuânn–ê，尤其下暗時仔睏甲跤手冷枝枝、皮皮tsùn（顫），想著阮尪就目屎流目屎滴。

有一日，社區有人咧辦Garage Sale，有賣舊冊、舊衫、CD、手工藝品、紀念品等等，我就一攤行過一攤慢慢仔看，雄雄看著一領真suí（媠）ê純羊毛的膨紗衫，歡喜甲若khioh（抾）著寶仝款，干單開五元的美金閣一直kā（共）人會多謝。

自從有這領媠媠ê膨紗衫，我就逐工穿咧睏，閣穿去餐廳食早頓，拄著別人穿露背裝抑是短洋裝ê時，我就感覺歹勢歹勢，啥人叫我遮爾仔驚寒—ah！

規个熱天，我總是穿著彼領裘仔佮彭沙衫，只有拜六抑是禮拜彼兩天，我會較uànn（晏）出門，若毋是佮朋友去看電影就是去日本街仔食日本料理，也定定相招去四界se̍h（踅），毋才有機會穿uì（對）台灣帶來的媠衫啦，毋過極加嘛是tshit-thô（𨑨迌）到欲暗仔猶袂起寒的時就趕緊轉去宿舍囉。

到今，若想起舊金山彼當時的我，就想起馬克吐溫(Mark Twin)有講過這句話："The coldest winter I ever spent was a summer in San Francisco." 我就感覺有影有跡足心適- -ah（矣）。

綜覽全部討論

總　覽版　務政　經健康醫療軍　武理　財文　化藝　文科　技台灣的美旅　遊 PISA 娛　樂鄉　土公　民認　同副　刊哈　啦范氏網

竹縫
視界耳聾
世界泰伯
觀點 Joy
隨筆哈利
天地 Jerry C
鳥世界射水魚
天　空討海人
鏡　頭嘻笑
人間詩情
畫藝老工仔
思　維網網
相連歷史
庫存

* 討論區內之言論，不代表本園之立場，一切法律責任仍由發言者本人負責
* 如果您有任何不當言論，本園有權決定是否保留您所送貼的意見。